Consello #06: As leccións máis importantes apréndense na cafetería

As leccións máis importantes apréndense na cafetería.

No semisoto da facultade, xusto debaixo das aulas 4 e 5, encóntrase a pouco coñecida aula 0. Nela impártense materias tan importantes na formación médica como son Cafetería Patolóxica, Cafetería Clínica ou Cafetería Médico-Cirúrxica. O profesor encargado da docencia é o eminente catedrático Luís García, ao que xentilmente chamamos Tío Luís. Por causas alleas ao departamento, os horarios poden solaparse cos doutras materias, polo que pode ser preciso que faltes a algunha delas. Mais non te preocupes, paga a pena. Saber Fisioloxía ou Anatomía pode facer que sexas mellor médico, mais as leccións que aprenderás na cafetería farán sen dúbida que sexas mellor persoa.