Día 58: Cousas que vou botar de menos do Burgo

• Que a señora da limpeza me saúde todas as mañás cun "Bos días, neniño!".
• Que cando menos o esperes apareza o subdirector friki disfrazado.
• Que o director bote broncas á xente ao mesmo tempo que lles ofrece un bombón ou un anaco de biscoito.
• Que as de recepción me saúden cun sorriso cada vez que entro e saio do Burgo.
• Que veñan rapazas para que lles imprima vinte ficheiros cando só me faltan 5 minutos para acabar a hora de impresións (un saúdo, Iria!).
• Que me veña xente para que aumente a velocidade ao seu portátil cheo de adware, con dous antivirus instalados ao mesmo tempo (ambos caducados), co navegador con vinte barras de ferramentas de propaganda e cincuenta programas que non sabe o que son (pero "ai, non mos borres por se acaso").
• Que a xente se queixe de que o wifi vai lento, e que cando lles digo que están a usar a rede mala digan que non queren configurar a boa, que realmente tampouco lles vai tan mal.
• Que haxa persoas que poñan cara de pánico cando lles pregunto se queren o Windows en galego.
• Facer retweet dos insultos da xente ao Burgo desde a conta oficial, para que morran de vergoña e veñan despois pedindo desculpas.
• Chegar á sala de Informática e encontrarme cun sospeitoso rolo de papel hixiénico...

• Que a veciña do lado decida que o momento idóneo de practicar o coito é a madrugada antes dun exame.
• Que a veciña do outro lado, ao escoitar os ruídos do coito, teña envexa e decida pórse tamén á faena, só que facendo aínda máis barullo.
• Ir cargado con bolsas e maletas, chegar á porta do teu cuarto e que non abra porque tes a tarxeta sen actualizar. Baixar, actualizala, subir, que continúe sen abrir, baixar de novo, que cho actualicen na conserxaría, subir e poder por fin entrar.
• Tomar o café na habitación do Fer.
• Pasar a roupa a ferro mentres vexo a tele xigante da Olalla.
• Facer torta de 3 chocolates con Laura.
• Recibir a visita de Ana, Juan ou Javi no momento máis inesperado.
• Saír de festa con Pablo.
• Ter conversas transcendentais no balcón da sala de estudo da terceira planta.
• Axudar nos talleres de repostaría de Sociocultura (ou, máis ben, molestar).
• Que a caixeira guapa do Gadis me mire mal, pero que na hora da verdade sexa un ceo de persoa.
• Vivir no 5º fase C e tardar máis en chegar da entrada da residencia á habitación que en chegar da zona nova ao Burgo.
• Que a xente se asuste ao ver unha silueta negra na miña porta.
• Que a xente faga fotos coa decoración da miña porta.
• Que algún gracioso me arranque o papeliño de "Hoxe non limpe" da porta e entre a da limpeza á mañá, mentres estou a durmir en calzóns.
• Encher unha sala de estudo do Burgo con notas secretas, como un carteliño no teito que di "deixa de ollar para o teito e pónteme a estudar, folgazán".

En definitiva, o que máis vou botar de menos do Burgo é... vivir no Burgo.